Til ære for Knut Hermundstad

Knut Hermundstad (1888–1976) vigde heile sitt vaksne liv til folkeminneinnsamling og kulturminnearbeid. Han var redaktør for, skreiv eller bidrog til over tjue bøker og ei rekkje tidsskrift om historia i Valdres.

I høve Valdres Folkemuseum sitt 125-årsjubileum inviterer vi til ein kveld om Knut Hermundstad og den store innsatsen hans for museet og kulturarven i Valdres.

12. november vil bygdebokforfattar Harald Hvattum fortelje om Hermundstad sitt liv og virke og kva han har hatt å seie for Valdres. Han vil løfte fram den omfattande utbygginga av friluftsmuseet på 1950-talet og Hermundstad si uvurderlege rolle som kjentmann og lokal tillitsmann for kulturminneforvaltninga og forskinga.

Professor i kulturvitskap Kyrre Kverndokk frå Universitetet i Bergen vil deretter fortelje om den store kulturhistoriske folkeminnesamlinga etter Hermundstad og kva potensial som ligg i dette materialet i dag.

Velkomen!

TID: Torsdag 12. november 2026 kl. 19.00
STAD: Festsalen Valdres Folkemuseum
PRIS: Kr 140 (kr 60 for dei under 26 år)
ARR: Valdresmusea

• Kjøp billett
• Les meir

Harald Hvattum er etnolog, lokalhistorikar og ein mykje brukt bygdebokforfattar. Han har ein særleg kompetanse på lokal- og kulturhistorie og har skrive omfattande gards- og ættesoger for lokalsamfunn i både Valdres og på Hadeland. Mellom dei største arbeida hans finn ein dei store bygdebøkene for Etnedal og Nord-Aurdal, i tillegg til ei rekkje bøker om lokal samfunnshistorie og kulturliv.

Kyrre Kverndokk er folklorist og professor i kulturvitskap ved Universitetet i Bergen. Han har ei spesiell interesse for tradisjonsarkiv og har mellom anna arbeidd med den folkloristiske innsamlingshistoria. Dei siste åra har han leia arbeidet med å digitalisere og gjere tilgjengeleg nasjonale tradisjonsarkiv i digitalarkivet samla.no.