Kvifor besøke dei gamle kyrkjene i Valdres?
I Valdres har vi heile seks stavkyrkjer og to steinkyrkjer frå mellomalderen. Dei gamle kyrkjene har alle levande, sakrale rom med dekor og objekt frå mange hundreår. Dette er opplevingsmetta rom med mykje tid og stille høgtid.
Kva handlar pilotprosjektet om
Prosjektet Kunnskapsløft for middelalderkyrkjene i Valdres er eit pilotprosjekt med oppstart mars 2026. Prosjektet blir til med støtte frå Kyrkjebevaringsfondet.
Målet er å forvalte og utvikle potensialet for formidling og engasjement som dei åtte mellomalderkyrkjene i Valdres representerer. Prosjektet inneber òg å kartleggje og vurdere kunnskaps- og kjeldetilfang, samt å utvikle nye strukturar for samarbeid. Gjennom nær tre år skal vi undersøke og teste ut korleis dei åtte middelalderkyrkjene i regionen vår kan vere ein stad for historisk refleksjon, læring, fellesskap og lokal identitetsbygging.
Bakgrunnen for samarbeidet er at kyrkjeeigarane i Valdres står overfor ei felles utfordring: mangel på ressursar til å halde kyrkjene opne og drive formidling med den kvaliteten og det omfanget som er ønskjeleg lokalt. Dei seks stavkyrkjene i Valdres ligg heilt i botn av den nasjonale besøksstatistikken, og dei to steinkyrkjene er i liten grad opne for publikum.
Kva skal gjerast?
Kartleggje og produsere kunnskap og kjeldetilfang: Kartleggje kjelder, praksis og behov, og avdekkje kunnskapshol. Drive opplæring og kompetanseheving. Utvikle digital kunnskapsbank. Målet er å styrkje kunnskaps- og kompetansegrunnlaget for bevaring og formidling av kyrkjene i Valdres.
Styrkje og fornye formidlinga: Utforske metodar og utvikle nye omvisingar og skuleopplegg. Lage pilotar for filmar, digitale guidar og QR-løysingar. Arrangere to større formidlingsseminar. Målet er å teste ut nye formidlingsformer som styrkjer lokal forankring, engasjerer publikum og utvidar forståinga av kyrkja si rolle.
Bidra til å utvikle kyrkjebygga som møteplassar: Vidareutvikle møteplassar og dialogarenaer. Involvere lokalbefolkninga og bidra til auka frivillig engasjement. Utvikle møteplassar der vi tek i bruk nye metodar for dialog og medverknad. Utvikle nye strukturar for samarbeid. Målet er å styrkje det lokale eigarskapet og samarbeidet med innbyggjarar, gjester og frivillige.
Kven er med?
Det er Valdresmusesa som leiar prosjektet, som blir til i samarbeid med kyrkjeeigarane og ei rekke andre samarbeidsaktørar både lokalt og nasjonalt: Kyrkjeeigarane og prestekollegiet. Reiselivet. Skular, forskings- og utdanningsmiljø. Frivillige og lokalbefolkning. Barn og unge. Handverkarar og næringsliv. Turistar og hyttefolk. Riksantikvaren, NIKU og Fortidsminneforeininga.
Forventa resultat
Prosjektet skal bidra til å styrkje formidling, samarbeid og engasjerande besøksopplevingar. Dette skal bidra til å utvide perspektivet på kva kyrkja kan vere i vår tid: ikkje berre eit religiøst rom, men òg ein stad for læring, fellesskap, historisk refleksjon og lokal identitetsbygging.
Prosjektet er tenkt som ein katalysator for eit større løft der målet er å knyte saman bevaring, handverksformidling, publikumsutvikling, verdiskaping, engasjement og ei sterk utvikling av lokalsamfunna. Gjennom tverrfagleg samarbeid og solid lokal forankring håpar vi å bidra til å gi kyrkjene i Valdres nytt liv – som opne, inkluderande og kunnskapsberande møteplassar.
Valdresmusea kan bidra med å:
- bruke mellomalderkyrkjene som utgangspunkt for kunnskap om ei kompleks samfunnsutvikling gjennom snart tusen år
- legge til rette for refleksjon om kyrkja si stadig skiftande rolle i lokalsamfunnet
- diskutere ulike prinsipp for bevaring og forvaltning
- utvikle strukturar og rutinar for formidling og besøksforvaltning