Hopp til hovudinnhald

Kulturarven og samfunnet

Korleis kan vi samarbeide betre om kulturarven i Valdres, og kva rolle kan Valdresmusea ta?

  • Dame soom står ved døra og stavkyrkjeportalen i Hedalen
    Guiden i Hedalen stavkyrkje, sommaren 2026 Anne Marit Noraker

Samhandlinga på kulturarvsområdet i Valdres er god på mange område, men det har vore vanskeleg å etablere langsiktige modellar for samarbeid. Ansvar, kunnskap og ressursar er fordelte mellom mange eigarar, kommunar, organisasjonar, frivillige miljø og aktørar innanfor reiseliv, næringsliv og offentleg forvaltning.

Forprosjektet Kulturarven og samfunnet undersøkte korleis desse ressursane kunne sjåast meir i samanheng. Eit sentralt spørsmål var om Valdresmusea kan ta ei utvida rolle i kulturarvsarbeidet i regionen.

Målet var ikkje at museet skulle overta ansvaret til andre, men å undersøkje korleis aktørane kan dele kunnskap, støtte kvarandre og løyse fleire oppgåver i fellesskap.

Kva har vi gjort?

Arbeidet omfatta intervju og kartlegging av organisering, ansvar og arbeidsdeling på kulturarvsområdet. Vi undersøkte særleg mellomalderkyrkjene, dei gamle ferdselsvegane og stølskulturen, men såg også på andre delar av kulturhistoria i Valdres.

Gjennom samtalar med kommunar, organisasjonar, eigarar, frivillige og andre fag- og utviklingsmiljø har vi kartlagt kva som fungerer godt i dag, kvar det finst utfordringar, og kva for oppgåver det kan vere nyttig å samarbeide meir om.

Kva viser kartlegginga?

Kartlegginga viser eit stort lokalt engasjement og mykje kunnskap om kulturarven i Valdres. Samtidig er arbeidet ofte avhengig av enkeltpersonar, mellombelse prosjekt og avgrensa ressursar. Det kan gjere samarbeidet sårbart og føre til at gode initiativ ikkje blir følgde opp over tid.

Forprosjektet peikar på behov for betre kunnskapsdeling, tydelegare arbeidsdeling og meir føreseielege samarbeidsformer. Det er også behov for møteplassar der kommunar, eigarar, frivillige, museum og andre fagmiljø kan drøfte felles utfordringar og utvikle tiltak saman.

Valdresmusea kan bidra med fagkompetanse, dokumentasjon, formidling, nettverk og koordinering. Ei utvida rolle må likevel utviklast i samarbeid med dei andre aktørane og tilpassast dei ressursane museet og samarbeidspartnarane har til rådvelde.

Frå forprosjekt til vidare arbeid

Forprosjektet blir avslutta i 2026. Kartleggingsrapporten samanfattar erfaringane og peikar på moglege retningar for det vidare arbeidet.

Delar av kunnskapen og arbeidsmåtane blir allereie førte vidare gjennom Kunnskapsløft for mellomalderkyrkjene i Valdres. Her undersøker vi korleis dei åtte mellomalderkyrkjene kan vere arenaer for historisk refleksjon, læring, fellesskap og lokal identitetsbygging, med god besøksforvaltning som ein del av arbeidet.

Erfaringane frå forprosjektet skal også vere eit grunnlag for vidare dialog om samarbeid og arbeidsdeling på andre delar av kulturarvsområdet i Valdres.

Les meir om Kunnskapsløft for mellomalderkyrkjene.

Prosjektansvarlege

Hanne Lykkja

Prosjekt Kulturarven & samfunnet

    Anne Marit Noraker

    Seksjonsleiar, kulturhistorisk seksjon

    Prosjektet har fått støtte av:

    • logo
      1/1